慰勞新手媽媽必備！荃灣親子好去處2024 9大一日遊必去之處行程懶人包！
生完BB或者啱啱開始照顧小朋友嘅你係唔係好攰呢？呢度整理咗9個荃灣親子好去處，包括唔同放電必去公園、打卡熱點、餐廳推介，等各位新手媽媽可以一邊放鬆，一邊俾小朋友放電~
荃灣親子好去處(室內) 1: 南豐紗廠/The Big Things Playground
南豐紗廠作爲香港藝文地標之一，想信唔少人到荃灣必定都會諗到。不過大家知唔知入面除咗各種文藝商店同餐廳之外，有個叫The Big Things Playground嘅遊樂場呢? 呢個芬蘭式室內叢林親子樂園擁有18個唔同嘅遊戲區域，包括攀爬、滑梯、繩網陣、彈床、賽車競技場等。另外亦會定期舉辦各種有趣工作坊同活動，例如甜品工作坊、植物種植、動物互動等，激發小朋友嘅好奇心~
一個地點滿足小朋友放電，一邊俾新手媽媽們可以打卡食嘢，絕對係新手媽媽們夢寐以求嘅親子好去處！
南豐紗廠大部分入場地方免費入場，而The Big Things Playground價錢係 $68 1小時~
地址：荃灣, 白田壩街, 45號南豐紗廠, 2樓205-207
電話：2810 9983
營業時間：10:30 – 18:30
荃灣親子好去處(室內) 2: 香港浩海立方探游館
浩海立方探游館係全港首個結合真實海洋生物同投影效果，充滿夢幻氛圍嘅海洋探索體驗館，致力透過教育、科研及創科項目，保育海洋。入面包括光影海洋觀景窗、多種水母、VR、MR亙動遊戲、海洋兒童樂園同特色餐飲區等。此外，每日都會有免費導賞團講解館內唔同水母嘅特性，仲有兩場水母喂食表演。通過唔同STEM教育課程，參加者可以基本認識海洋面臨嘅危機，以及如何成為保育海洋一份子。浩海立方探游館結合動靜態活動，係必去嘅荃灣親子好去處~
浩海立方探游館價錢最低由$76起~
地址：荃灣楊屋道 88 號 Plaza 88 – 8樓
電話：3897 7388
營業時間：10:30 – 18:00
荃灣親子好去處(室內) 3: Miris Mama
既然要慰勞新手媽媽，當然要同做到真正放鬆！爸爸們！係時候帶小朋友去Plaza 88下面嘅浩海立方探游館玩下了解下海洋，俾新手媽媽們可以上去Miris Mama好好放鬆了~
新手媽媽難免會因為長期維持不良姿勢，例如長期低頭、不當用力、經常拎重嘢，或者產後出現腰骨、肩頸、抱B等痛症…… Miris Mama 按摩舒緩組合為各位新手媽媽提供淋巴排毒按摩，幫新手媽媽放鬆肌肉疲勞，再因應疲勞狀況透過特製黃銅排毒治療頭，輸出高效傳熱及生物電流，於痛症位置遊走，釋放熱能同正電能，疏通穴位及淋巴管道，改善痛症問題！
地址：新界荃灣楊屋道88號Plaza88(映日灣)20樓A室 (荃灣西港鐵站D出口)
電話：9712 6782
營業時間：星期一至五12:00至21:00 | 星期六、日及公眾假期10:00至19:00
荃灣親子戶外好去處1: 荃灣海濱段單車徑
荃灣海濱段單車徑全長約2.3公里，沿途唔知可以欣賞藍巴勒海同青衣島景色，仲會經過多個公眾休憩同康樂場地，例如荃灣公園、荃灣海濱公園、荃灣海濱長廊等，隨便一個位置都夠俾小朋友玩幾個鐘。另外，單車徑都有單車泊位同公眾休憩空間，配合不時放置嘅唔同卡通人物，不論大家係踩單車踩到攰，還是小朋友唔識踩單車，都可以俾大家休息打卡。
荃灣親子戶外好去處2: 光板田村
話明親子好去處，感受一下大自然是必須的吧~ 光板田村有港版「彩虹眷村」之稱，係早年由村民同義工小朋友一齊繪畫嘅~ 壁畫大多以菠蘿同蜜蜂為主題，彩虹樓梯同彩色小屋係最多人打卡嘅位置。想同小朋友遠離城市，呢個俾壁畫覆蓋，充滿生氣嘅小村落都不失為一個荃灣親子好去處~
荃灣親子戶外好去處3: 機場核心計劃展覽中心
作為一座擁有近百年歷史嘅三級歷史建築，呢座充滿歐陸風情嘅米白色機場核心計劃展覽中心唔單止設有望遠鏡俾遊客可以喺觀賞台盡情享受海天一色嘅美景，入面更展出10項核心工程模型、展板同錄影帶等，令大家可以親身感受以前嘅時光，甚至激發小朋友們對科技嘅興趣~ 此外，唔同角落都有唔少打卡位，大家記住拎埋相機，留低同小朋友們美好嘅瞬間~
地址：新界汀九青山公路四百零一號
電話：2491 9202
開放時間：星期二至五（上午十時至下午五時）
星期六、日及公眾假期（上午十時至下午六時半）
中心於公眾假期照常開放（包括列為公眾假期的星期一）
元旦、農曆新年及聖誕假期除外
荃灣親子好去處(美食推介)1: 老闆娘雲南米線
小編覺得，想認識一個地方其中一個最便捷嘅方法就係食最地道嘅餐廳。而位於荃灣香車街街市嘅老闆娘雲南米線就係小編心目中覺得最代表到香港美食嘅其中一間。位於街市嘅佢可以俾小朋友感受一下從前喺街市解決3餐嘅感覺之餘，唔污糟嘅環境亦唔會令小朋友留低唔好嘅印象~ 呢間小店一直堅持逐碗煮，招牌麻酸辣湯係精髓。炸物例如酥炸雞球、炸豬排、野菌腐皮卷、魚肉響鈴等，即叫即炸，絕對可以話係畫龍點睛。
地址：荃灣香車街熟食中心3樓28-29號舖
電話：9842 1971
營業時間：17:00-22:00 截單時間為21:00（逢星期三休息）
荃灣親子好去處(美食推介)2: ADO洋食屋
今年年頭由大圍搬到荃灣，以流心蛋包飯聞名嘅ADO洋食屋，提供多款日式西餐，例如明太子奶醬蛋包飯、焙茶巴斯克芝士蛋糕、經典日式牛肉醬汁蛋包飯、濃厚芝士肉醬蛋包飯、手打漢堡扒。粒粒分明又充滿蕃茄汁嘅西炒飯，加上嫩滑嘅蛋……無論係配合經典日式牛肉醬汁定係明太子奶醬，都可以由唔同角度俾到好溫暖嘅感覺你~ 店舖雖小，但舒適，店員對小朋友都非常友好。相信小朋友食得開心，新手媽媽都有時間可以自己享受遍刻安寧~
地址：荃灣享成街8號香城大廈地下5A號舖
電話：5596 8759
營業時間：星期一至五11:30 – 15:30 & 17:30 – 21:30
星期六至日 + 公眾假期11:30 – 22:00
公眾假期前夕11:30 – 15:30 & 17:30 – 21:30
荃灣親子好去處(美食推介)3: 民豐粉麵行
食完正餐又點少得甜品呢? 民豐粉麵行呢間老子號主打懷舊甜品，為咗佢哋嘅爆餡糯米糍，每日都唔少人慕名而來，風雨不改。糯米糍有開心果、黑芝麻、豆沙、花生等口味。外皮軟熟有少少咬口，餡料更係真真正正咁滿瀉！小編私心大推黑芝麻糯米糍，砂糖甜甜哋配上黑芝麻獨有嘅香味……誇張少少咁講根本係喺口入面進行緊演奏！(而家可能少啲人排，小編星期日15:45排都只係排咗10分鐘左右~)
除此之外，民豐粉麵行仲有上海麵、韭菜餅、水餃、湯圓、雲吞等都值得一試~
地址：荃灣街市街35號地舖
電話：2492 6860
營業時間：08:30 – 22:00
生完BB或者啱啱開始照顧小朋友唔等於冇自己生活同時間。不論係唔係新手媽媽，大家仍然可以安心地享受自己嘅興趣，甚至可以因為新生命嘅出現，得到雙倍嘅快樂！今日小編幫大家整理咗9個荃灣親子好去處，唔知大家又覺得如何呢? 希望大家鍾意🩵🩵
